गरीब बिचारे पुरुष

ह्या पुरुषांची व्यथा

तुम्हा सांगू कुणा वेळी

गल्लीतले सिंह कसे

घरी बनतात शेळी

रुद्र झाला सांब तरी

फक्त लोक होती चूप

रागातून पार्वतीच्या

जन्मे गणेशाचे रुप

वध रावणाचा करी

राम एकाच बाणात

पण नशीबी मृगाच्या

मागे धावणे रानात

गीता सांगणारा कृष्ण

सुद्धा बनतो सुदामा

येते घेऊन समोर

जेंव्हा हट्ट सत्यभामा

पराभव देवांचाही

तिथे कोणाला सांगावे

साऱ्या व्यथांचे गाऱ्हाणे

आता कोठे हो मांडावे

माता, भगिनी, प्रेयसी,

पत्नी, मुली आणि सून

साऱ्या नात्यांच्या गर्दीत

पुरुष राबतो कसून

स्त्री अजब रसायन

सदा बोलते कोड्यात

देता प्रश्नांची उत्तरे

जाई आयुष्य खोड्यात

मौन अथवा बोलणे

दोन्हीतही पंचाईत

अन अश्रुधारेपुढे

वीर योद्धेही गळीत

कसे वागावे नरांनी

त्यांची व्यथाच निराळी

गल्लीतले सिंह कसे

घरी बनतात शेळी